Em 28 de outubro, ao ganhar as eleições brasileiras, Luiz Inácio da Silva ("Lula") dixo à multidom e ao mundo: "Hoje, o Brasil votou para mudar. A esperança venceu o medo". Esta frase encerra exactamente o que aconteceu, e sublinha a importáncia deste evento num mundo em que, designadamente no último ano, o medo estava vencendo a esperança em quase toda a parte.

O director do jornal uruguaio Brecha saudou esta eleiçom como "o maior triunfo da esquerda latino-americana em toda a sua história", umha rejeiçom do "gosto amargo das promessas dos gurus do livre mercado". A reacçom das forças populares por toda a América Latina foi de alegria e assombro. A reacçom das forças do neoliberalismo e o espírito de Davos foi de incerteza quanto a que fazer. Tagarelárom. Explicárom a vitória polo facto de Lula e o sua organizaçom, o Partido dos Trabalhadores (PT), "se terem movido para o centro". Mas nom estám mui certos disso, umha vez que os líderes políticos e os meios de comunicaçom do Norte estám a fazer declaraçom trás declaraçom, afirmando que Lula deve mover-se para o centro.

O único acontecimento comparável na última década foi o triunfo do Congresso Nacional Africano na África do Sul em 1994. Umha olhada ao que ali ocorreu pode conferir-nos algumha compreensom do que está a acontecer no Brasil. Permitam-me começar com aquilo que é comparável nas duas situações. Primeiro, ambas representam a vitória de forças progressistas, após umha luita mui prolongada, no estado economicamente mais poderoso da sua regiom – umha vitória que parecia mui improvável dez anos antes. De facto, tam só três meses atrás, a maioria dos comentaristas prediziam que Lula ganharia na primeira volta e seria derrotado na segunda. Em lugar disso, ganhou com 61% de votos.

Na África do Sul, a chegada ao poder do ANC deu fim à era do apartheid e estabeleceu o governo da maioria. No Brasil, a chegada ao poder do PT significou a eleiçom de um partido de trabalhadores num país em que a classe média retivo sempre as rédeas do poder. Em ambos os casos, a eleiçom foi esmagadora. Em ambos os casos, a transiçom foi pacífica e sem oposiçom do exército que, nos dous países, tinha jogado um papel político central (e reaccionário).

Em ambos os casos, esta transiçom política foi possível nom somente polo apoio popular ao partido ganhador mas também por cruciais conversas de bastidores com alguns sectores decisivos do mundo empresarial que dérom apoio tácito ou mesmo activo à transiçom em troca de algumha forma de garantia de que o novo governo respeitaria polo menos algumhas das regras do mundo financeiro que essas camadas empresariais consideram essenciais para a sua sobrevivência. No caso da África do Sul, oito anos depois, esse pacto continua mais ou menos vigente. No caso do Brasil, podemos esperar o mesmo.

Por que foi feito tal acordo? Desde o ponto de vista das camadas empresariais, o acordo produziu-se porque era útil um compromisso. Temiam que poderiam perder muito num enfrentamento com um governo de esquerda, mesmo que afinal conseguissem conduzi-lo à sua derrocada. Viam o próximo governo (ANC, PT) liderado por pessoas capazes e inteligentes que teriam apoio popular e cujo esforço reformador, embora radical, seria "razoável". No que di respeito às forças populares entrantes, elas sabiam que seriam eleitas para a melhoria da situaçom económica da gente comum, e temiam que umha retirada radical do investimento das grandes empresas do seu país produzisse o contrário, e bem aginha. Para ambas as partes, foi um acordo pragmático.

A questom era e continua a ser: valia a pena desde o ponto de vista das forças populares? Tanto no ANC como no PT, havia três grupos no momento da ascensom ao poder: um grupo de pessoas pragmáticas, pouco coagidas por compromissos ideológicos, que julgava a chegada ao poder e a permanência nele como a razom principal das suas políticas; um segundo grupo, mais comprometido com a ideologia histórica do movimento, mas que também considerava a necessidade de manter unido o partido se quigesse lograr sequer parte dos seus objectivos; e um terceiro grupo, bastante pequeno, disposto a condenar e a opor-se a qualquer desvio de umha ideologia de esquerda tradicional.

É o segundo grupo o que escolhe o caminho mais estreito, e o que tem maior dificuldade em manter o seu alcance e a sua influência. Na África do Sul, este segundo grupo tem umha base institucional nos chamados aliados do CNA, que som a federaçom sindical (COSATU) e o Partido Comunista da África do Sul (SACP). Oito anos depois, o COSATU e o SACP com freqüência som publicamente críticos com o governo mas continuam a ser aliados seus. Continuárom a ser influentes. No Brasil nom existe um equivalente formal, embora o Movimento dos Sem Terra (MST) poda jogar esse papel. Em ambos os países, o terceiro grupo foi até agora extremamente pequeno e relativamente irrelevante.

Existem obviamente diferenças entre ambas as situações. Quanto o ANC chegou ao poder em 1994, a economia-mundo estava numha situaçom relativamente melhor e o governo sul-africano nom tinha carregado com compromissos com o FMI. Além disso, a luita contra o apartheid tinha umha ressonáncia mundial que tornou Mandela umha espécie de herói da cultura mundial. Tanto o PT como Lula som menos conhecidos, polo menos fora da América Latina. E embora Lula seja umha personalidade mui atractiva, talvez nom iguale o carisma mundial de Mandela.

Mas, por outra parte, Lula e o PT tém outras cousas do seu lado. A América Latina está virando para a esquerda como pode ver-se polo que está a passar-se na América Central, Equador, Peru, Bolívia e Argentina entre outros lugares. Há um novo talante espalhando-se polo continente, e é o talante do espírito de Porto Alegre. Lula encarnou esse talante desde o princípio, e agora está em posiçom de apoiá-lo com os recursos e o prestígio do governo brasileiro.

Se alguns sectores empresariais brasileiros estám a apoiá-lo nom é apenas como um pis aller, mas também porque esperam que reforce a capacidade das empresas brasileiras para enfrentar as multinacionais controladas polos EUA. Esperam que reforce o Mercosul e seja umha força de resistência construtiva a Área de Livre Comércio das Américas (ALCA ou FTAA). Se os militares brasileiros nom se sentem descontentes de que tenha sido eleito, é porque som fortemente contrários ao Plano Colómbia, apoiado polos EUA e esperam que ajude a deter a extensom da violência.

Lula no poder nom é Sendero Luminoso nem a Revoluçom Cultural chinesa no poder. O PT será um poderoso regime progressista no país mais importante da América Latina, um dos países economicamente sobranceiros do sistema-mundo, umha força trás a qual a esquerda e o centro-esquerda latino-americanos podem unir-se nos anos futuros. Pode que Lula seja mui prudente a respeito da política financeira do governo brasileiro. Mas pode contodo erigir-se como umha barreira real frente ao impulso neoliberal na América Latina e no mundo. Nom só a esperança venceu o medo no Brasil, mas a esperança gera esperança por todo o mundo. Enquanto o mundo encara a invasom estadunidense do Iraque e a conseqüente agitaçom caótica que provocará, a eleiçom de Lula é um sinal de que podemos contra-atacar.

Immanuel Wallerstein (1 de novembro de 2002).

© Immanuel Wallerstein 1998, 1999, 2000, 2001.

Copyright de Immanuel Wallerstein. Todos os direitos reservados. É permitido baixar e divulgar este texto electronicamente ou por e-mail, sem fins comerciais, na Internet, desde que seja garantida a sua integridade e figure a nota de direitos autorais. Para traduzir, publicar em meio impresso ou quaisquer outros meios, incluir em sítios comerciais da Internet e extractar, contactar o autor em: (waller@binghamton.edu; fax: 1-607-777-4315).

Estes comentários, de publicaçom bimensal, tentam ser reflexões a respeito do cenário mundial contemporáneo, visto desde umha perspectiva nom dos manchetes imediatos, mas de longo prazo.